حقوق المرأة باللهجة الحجازية الجميلة على قلوبنا .(من إيميلي )

ما يرفع ضغطي شَي زَي كلمة حقوق المرأة .. وبالذات في السعودية .وهادي المشكلة طلعت متى؟
بعد 11 سبتمبر .... سبحان الله .. يعني كانوا من ألف وأربعمية سنه نايمين ..
وفجأة كده صحيوا وقالوا: وه ياندامة .. إيش هادا؟ أتْـرِنُّو إحنا لنا حقوق؟! مادام كده ... الإنتخابات البلدية ليه ما نشارك فيها؟ وليه ما نروح هناك ونرقع بالصوت؟
يا أختي حلال عليكم البلدية كلها .. يعني إيش تبغوا تسووا؟
تحطوا ضوابط إصدار الرخص لمحلات الحلاقة مثلا؟
والا تناقشوا سفلتة الشارع اللي يودي على بيت أم إبتسام؟
والا ليه الشارع الفلاني ما فيه كوفيرة مغربية وكل اللي فيه مصريات؟
يا أختي ريِّحي راسك . اذا كثير من الرجال ما سوُّوا حاجه ... بالله عليكي حتسيبي بيتك وعيالك وشغلك ... عشان تناقشي مشروع إنتخابي؟ هادا من تمام الفضاوه..
طيب قولوا لوحْدَه زواج أختها الليلة: بلاش تروحي للكوفيره اليوم يا مدام وتعالي نناقش حقوق المرأة أو نحضر المجلس البلدي و نتخذ قرارات مهمة .. وأترك لكم جوابها .. إيش يكون
أما عن حقوق المرأة في السعودية .. فياسيدي الست هنا لها حقوق وواجبات ما تتنازل عنها.
مثلا: في بلدان كثير عربيه وأوروبيه تلاقي شحط طويل عريض جالس في الباص ...وقدامه وحده في الشهر التاسع واقفه على رجولها وشايله طفل تاني على كتفها .... إن الشحط يتحرك؟ .. أبدا...
إن الثور يحس؟ .....لايمكن.
لكن هل يمكن يحصل هادا في السعودية؟ أبدا ..
واللي يبغى يجرب.... الطريق قدامو .... يا عمي العملية كلها دلع حريم في دلع حريم ...
رايح أعطيكم بعض الأمثلة وقولوا لي مين اللي آخِد حقُّوقه بالكامل وزياده؟
وهل عندنا المرأة متساوية مع الرجل .. والا هي أحسن مِنُّو؟
قال حقوق المرأة .. قال.

منظر عام

رجال محترمين زي الورد واقفين أمام صراف في بنك .. وتِجي أختنا في الله
)اللي يقولو إنها مهضومة الحقوق)
تتقدم للصراف (ِATM)مباشرة ولا على بالها من الطراطير اللي واقفين من ساعات ..
وبعضهم مستأذنين من عملهم. طيب ليه ما توقِّف تِمسك سِرا ورا عشرين بنغالي... وثلاثين باكستاني ... وخمسين سعودي... واثنين معقبين معاهم شوية فواتير مقاس إكس لارج
.. وإذا أحد كلمها وقال لها أتفضلي يا أختي ترد عليه وتقول: لا، معليش. المرأة زَيّ الرجال
.... خليني في الطابور .... زَيِّي زيكم؟! .... ليش ما تقول كده؟! ... والا هي تماحيك وبَس !
ونفس المنظرفي الجوازات .... والأحوال ... والتأمينات .. ويقدر أحد... يقول إنه من ظهر أبوه .... يفتح فمُّه؟ ... على طول يسمع العبارة الشهيرة ... ( عيب عليك .... إنت ماتستحي؟ .. هذه حرمة...إنت ما عندك أهل ...((!ويضطرالراجل إنُّه ينكتم ويسكت .. بل إن المرأة تشفع للراجل جوزها عشان يتقدم على الرجال الباقين. في المطار .. مثلا .. ما تشوفهم يطلِّعوا العوايل أوَّل ..
وبعدين بقية الركاب؟
قال حقوق المرأة ... هههه!

اقتصاديا

شوف الراجل.. السبع... الغضنفر.. المفتري...له ثوبين أوثلاثة في السنة ..
يروح بها العمل، ويحضر بها عزايم وزواجات، ويقابل بها كبار المسؤولين، الخ، الخ، الخ...
والمرأة بسلامتها .. بقيمة أدوات مكياجها فقط ...
تقدر تفتح محل خياطة رجالي محترم . ويا ريت تحط من مكياجها في البيت.. لأ.
دا بَس للخروج ... وقيمة صباع روج والا علبة بودرة تساوي قيمة جوال جوزها
.. وكمان ازيدك من الشعر قصر .. مو بيت .. من حقوقها فستان لكل فرح. و مكياج.
وكوفيرة..وجزمة..وشنطه. وكمان خُدوا هادي .. سابع بنت عمي. ملكة أخت جارتنا . ولازم هدية. واللطخ يدفع .مو مهم الفلوس جات من فين .. المهم يدفع .. والدنيا ممكن تنقلب على الراجل واللي خَلَّفوه علشان موضوع (مهم وحيوي زي كده.)
قال إيه! حقوق المرأة.

نفسيا

الزوج مطالب يكون أربعة وعشرين ساعة رومنسي ومبتسم، ولا يبقى جلف وإبن ستين في سبعين..
ويعني إيه عنده مشاكل في العمل؟! والا أقساط متأخره؟!
والافواتير؟! والا مقاضي ما يعرف كيف يجيبها؟!
مو مهم ..واجب عليه إنه يرجع من العمل للبيت مروِّق ومبسوط وبَس ... كإنه كان في شرم الشيخ مصيف مع نانسي عجرم .. ((مجرد مثل .. تف .. بره وبعيد(( ....
والست بسلامتها من ساعة ما يرجع من عملو .. وقبل ما يفصخ حوايجو: شوف بزورتك (لاحظوا .. بزورتك) طفَّشوني .. إيش رأيك نغير غرفة النوم؟ التلفون ما فيه حراره ...
جاتني رساله على الجوال يقولوا الفاتوره طلعت .. أَلحق سّدِّدو قبل ما يوقفوه عن الخدمه ... ... .. ... ومع هادا كُّلو ..لازم يبقى رومانسي.
بينما هي وبكل سهولة تصحى بسلامتها في الظُهر...وتجد الكارثة الكبرى....يوه ... ما عندنا صلصه ...وبكل رقة تتصل...ألو ألو ...أبو خالد موجود؟ ممكن أكلمه لو سمحت؟ ألو .. إيوه... أنا ..
حتكون مين يعني؟... المهم ... جيب معاك غدا ... ماهو إنت يا فالح نسيت تجيب صلصه معاك أمس.
ولإنه موفاضي.. و قرفان من العمل.. يصدق المسكين إنه هو إللي نسي ويقول بكل شجاعة ..... طيب.
وفوق هذا كله آخر السنه: طفشانه ....فين حتودينا ...والله بنت خالتي راحت أمريكا .. وبنت عمي ما تصيف إلا فْ أوروبا.... يا عيني علينا إللي ما نروح غير يا مصر... يا سوريا ... والسنة اللي غيَّرنا فيها ... رحنا ماليزياوماتقول شوف زوجة فلان ايش عملت لزوجها لانه من المحضورات .

وفي رمضان: تعبت ....أوف .....إنت داري عن حاجه؟ أنا أبغى خدامة... أنا خلااااااااص .. ومن ثالث يوم رمضان ....مقاضي العيد من جده ...أختي جابت ملابس لها ولعيالها .. إيش أقولَّك بس ... وخُد مشاوير لليييييييييييل ... والراجل المسكين لما ينزل السوق مع مرته ما يقدر يشتري ولااااا شَي لنفسو
لأنو طول الوقت ماشي وراها من دكان لدكان، وشايل زنابيل إلين ما كتفو يتخلع.
وهي تطالع فيه وهو يتطوَّح من ثقل الزنابيل .. ولا تقول لُو فزعه .. حتى لو بالكِدِب. وآخرتها بعد ما يرجع البيت تقول لو إنها لِسَّه ما أشترت ملابس العيد!!!!!!
وإذا فكَّر ينزل السوق لحالو عشان يشتري شي لنفسو ... على طول يكون مشبوه .. إيش ينزلك لوحدك وسط الحريم؟ .. طيب إنت مو كنت معايا في السوق .. أحد قال لك لا تشتري؟
قال إيه؟ ... حقوق المرأة.

أضافه
السواق رجال والكوافير رجال والطباخ رجال والخياط الى يخيط توب الست رجال

شرعا

المرأة لها حظ من أبوها .... وحظ من زوجها . هادا غيرأمها .. وأخوانها ... وأبناءها .. والراجل مطالب إنو هواللي يصرف عليها مهما كان عندها فلوس.
وثانيا: الرجال لازم يروحوا للمسجد خمس مرات في اليوم .. جمع وجماعات . حر وبرد .. ليل وصبح .. لازم يروحوا ... بينما الست تصلي تحت المكيف ...
في غرفتها... وأجرها زي الرجال تماما .... ياعيني .. يا عيني ..والله الإسلام أعطاكم كتير .... وياريتو يِبان فيكم

الدكتورة : ليلى صالح

حقوق المرأة باللهجة الحجازية الجميلة على قلوبنا .(من إيميلي ) 1487866497

والله كلام جميل وموضوع رائع ومميز

مشكوووووووووور

مستشارنا الحكيم

ابن سودة عسير

على كل ما تطرحه لنا من فائده

حقوق المرأة باللهجة الحجازية الجميلة على قلوبنا .(من إيميلي ) 1487866497

شرفني مرورك نورتي صفحتي مشكووووووووووووووره سحابة الخير .

صادقين مو ناقصنا شي الحمد لله على كل حال شكرا لك على المواضيع المميزة وباركــ الله فيكــ

بارك فيك وفي اسرتك الكريمة من الأب إلى اصغر واحد نورتي صفحتي .

من قآآآآل ما نآآآآقصنآآآ شئ أصلا حقوقنا كلها مهضومه

تفكيرهم للمرأة بس شغل البيت فقط لا أقل ولا أكثر ولو طلبت لو حاجه بسيطه طلعو ونزلو

وانتم تقولو ما ناقصها شي أتمنى لو تكون السلطه بيدها

يعطيك العآآآآآآفيه مستشآآآآرنآآآ لو اتكلم من الحين لحد بكره في حقوق المرأة مراح أنتهي

خآآآآلص شكري وتقديري

اهلآ وسهلآ بك لعيونك اشتاق اود فقط طلب منك طلب أن تذكري ماهي حقوق المرأة المهضومه او المنسية لكي نكون على بينه وشكرآ لك بأنتظار اجوبتك .

لعيونك اشتاق كتب:: من قآآآآل ما نآآآآقصنآآآ شئ أصلا حقوقنا كلها مهضومه

تفكيرهم للمرأة بس شغل البيت فقط لا أقل ولا أكثر ولو طلبت لو حاجه بسيطه طلعو ونزلو

وانتم تقولو ما ناقصها شي أتمنى لو تكون السلطه بيدها

يعطيك العآآآآآآفيه مستشآآآآرنآآآ لو اتكلم من الحين لحد بكره في حقوق المرأة مراح أنتهي

خآآآآلص شكري وتقديري

حقوق المرأة باللهجة الحجازية الجميلة على قلوبنا .(من إيميلي ) 2604066407

ترى اختي لعيونك اشتاق انسانه رائعه وهاديه وطيبه

وحبوبه ومسالمه لكن سبحان الله احنا اذا مرينا في ضغط نفسي

نحزن على انفسنا ونقول ليتنا رجال

ونشعر اننا ناقصين عن غيرنا الله المستعان لكن اذا رجعنا لعقولنا

نحمد الله على فضله علينا بأن خلقنا نساء

وهذي رحمه من الله علينا

وسامحوني على المداخله <<<<<<< الاخت داخله عرض هع هع

بالعكس سحابة ياريت نتناقش في هذا الأمر لكي نساعد بعضنا البعض ونتفهم الموضوع جيدآ شكرآ لمداخلتك الراقية .

جزاك الله خير موضوع ممتاز وفي قمة الروعه و الصراحه الكاتبه ابدعت في كلماتها وكلامهاعين الصواب والعقل هذي هي الحقيقه ليه
ننكر النعمه مشكور اخي الكريم على طرحك

ياهلا وغلا بأختي الفراشة على مرورك الغالي .

» طريقة عمل البليلة الحجازية بالصور
» عدنان ولينا باللهجة السعودية..
» اغنية بابا فين باللهجة السودانية
» اسرائيل في قلوبنا ؟؟؟
» حقوق النبي صلى الله عليه وسلم على المسلمين